Որոշումը պետք է լինի փոխզիջումային

Ձգձգվող հակամարտություններն ամենահրատապ հիմնախնդիրն են, քանի որ խոչընդոտում են տարածաշրջանի բոլոր ոլորտների զարգացմանը. ըստ ադրբեջանական Trend գործակալության` ասել է Հարավային Կովկասում ԵԱՀԿ ԽՎ նորանշանակ հատուկ ներկայացուցիչ Ժոաո Սոարեշը:

«Իմ մանդատը բավական ընդարձակ է` ներառելով ԵԱՀԿ անվտանգության համընդհանուր հայեցակարգի բոլոր երեք ուղղությունները: Ես, սակայն, իմ աշխատանքի մի մասը կնվիրեմ տարածաշրջանի երեք երկրներում կարեւոր ժողովրդավարական բարեփոխումների իրականացմանը»,- ասել է նա:

Սոարեշի կարծիքով` Ղարաբաղյան հակամարտության կարգավորման ԵԱՀԿ Մինսկի խմբի ձեւաչափը լավագույն ֆորումն է Ադրբեջանին եւ Հայաստանին օգնություն ցուցաբերելու համար: «Այնուամենայնիվ, Մինսկի խումբը չի կարող որոշում կայացնել հակամարտության որեւէ կողմի փոխարեն: Կողմերն իրենք պետք է համաձայնության գան: Որոշումը պետք է լինի փոխզիջումային, հետեւաբար` երկու կողմն էլ պետք է զիջումների գնան իրենց որոշ պահանջներում»,- ընդգծել է նա:

Ըստ Սոարեշի` դա ցավոտ եւ բարդ գործընթաց է հակամարտության կողմերի համար, սակայն խաղաղ լուծումն առաջ շարժվելու միակ կենսունակ միջոցն է:

Հատուկ ներկայացուցիչը համոզված է, որ անձնական այցը տարածաշրջան Հայաստանի եւ Ադրբեջանի հասարակությունների բոլոր շերտերի հետ Ղարաբաղյան հակամարտության հարցով ուղիղ երկխոսության միակ ճանապարհն է: «Որպես Հարավային Կովկասում ԵԱՀԿ ԽՎ հատուկ ներկայացուցիչ` ես կայցելեմ տարածաշրջան որքան հնարավոր է շուտ»,- ասել է նա: