Թբիլիսիում չեն բացառում փոխզիջումային անդամակցությունը ՆԱՏՕ-ին

Վրաստանի ԱԳՆ ղեկավար Միխայիլ Ջանելիձեն մեկնել է Բրյուսել՝ «Վրաստան-ՆԱՏՕ» հանձնաժողովի աշխատանքին մասնակցելու: Նա պետք է քննարկի Թբիլիսիի իրականացրած բարեփոխումների ընթացքը և նոր բարեփոխումների նպատակահարմարությունը. հայտնում է Независимая газета-ն:

Նաև նախատեսված են հանդիպումներ ՆԱՏՕ-ի գլխավոր քարտուղար Իենս Սթոլթենբերգի և նրա տեղակալների հետ:

Թերթը հայտնում է, որ նախօրեին ԱՄՆ Heritage Foundation ռազմավարական հետազոտական ինստիտուտը հրապարակել է զեկույց, որում նշվում է, որ մասնավոր զրույցներում պաշտոնական անձինք չեն բացառում ՆԱՏՕ-ին երկրի «փոխզիջումային անդամակցումը», որը կենթադրի Աբխազիայից և Հարավային Օսիայից «ժամանակավոր հրաժարում»:

Ըստ զեկույցի` «ՆԱՏՕ-ի կանոնադրության 5-րդ հոդվածը, որը ենթադում է հավաքական պաշտպանություն և անվտանգության երաշխիքներ, ժամանակավորապես չի տարածվի Ռուսաստանի կողմից օկուպացված տարածքների վրա, մինչև այդ հարցը չլուծվի Ռուսաստանի հետ խաղաղ բանակցությունների ճանապարհով»: