Արտագնա աշխատանքից արտագաղթ մեկ քայլ է (տեսանյութ)

Ողջ մնա գյուղում մնացողը, օտար երկիր գնացողը...

Մինչ միգրացիոն գործակալության պետը ՌԴ «Հայրենակիցներ» ծրագրի նկատմամբ հետաքրքրության աճի համար մեղադրում է ԶԼՄ-ներին ու արտագաղթի վերաբերյալ հրապարակումներում առկա թվերն էլ ուռճացված է համարում` մարդիկ շարունակում են լքել երկիրը:

Դեռևս խորհրդային տարիներին Մարտունու տարածաշրջանը հայտնի էր «խոպանչիներով»: Այն ժամանակ մեկ-երկու ամսով արտագնա աշխատանքի էին մեկնում հիմնականում Ն. Գետաշեն-Երանոս ենթաշրջանի գյուղերի բնակիչները: Կայուն աշխատավարձով ապահովված «դուրս չգնացողները» «խոպանչիներին» անգամ աղջիկ չէին տալիս: Հիմա հակառակն է. աղջկա հարազատները նախ հետաքրքրվում են` տղան դուրս-մուրս գալի՞ս է, արտերկրում բարեկամներ ունի՞…

Ու օտար հողում իրենց ընտանիքի հացը վաստակելու հույսով արտագնա աշխատանքի են մեկնում արդեն բոլոր համայնքներից: Դեռ ավելին, գնալով ավելի մեծ թիվ են կազմում ընտանիքներով հեռացողները: Յուրաքանչյուր գյուղ անգամ իր հիմնական ուղևորության կետն ունի. վաղաշենցիներն, օրինակ, Վորոնեժում են, վարդենիկցիները` Պերմում ու Տյումենում, իսկ լիճքեցիները` Մոսկվայում: Վերջիններս անգամ գյուղի նորակառույց թաղամասն են ոչ պաշտոնապես անվանակոչել ՌԴ վարչապետի անունով: