Արտագաղթ, գործազրկություն, աղքատություն. նախագահը թվեց առաջնային խնդիրները

ՀՀ վերընտրված նախագահ Սերժ Սարգսյանը ելույթ ունեցավ Մարզահամերգային համալիրում: Նա հայտարարեց, որ նախագահի պաշտոնը ստանձնել է մեծ պատասխանատվությամբ, ինչը 5 տարիներ ընթացքում երբեք չի լքել իրեն:

Պետության առաջնային խնդիրներից նա առանձնացրեց տնտեսականը, ապա նշեց արտագաղթը, գործազրկությունը, աղքատությունը:

«Համեմատեք 5 տարի առաջվա Հայաստանը եւ այսօրվա Հայաստանը, համեմատեք խոսքի ազատությունը 5 տարի առաջ եւ այսօր: 5 տարի հետո մենք ունենալու ենք ժողովրդավարության բոլորովին նոր մակարդակ»,- հայտարարեց նա:

Արտաքին քաղաքականության գործում նախագահը առաջնային համարեց ԼՂՀ խնդիրը: «ԼՂՀ-ի խաղաղ խնդրի կարգավորումը մնալու է մեր առաջնահերթ խնդիրը, քանի դեռ մենք այն չենք լուծել: Մենք բարձրացնելու ենք մեր անվտանգության մակարդակը: Մենք պարտավոր ենք ապավինել մեր ուժերին, մենք երբեք չենք ահաբեկել սեփական ժողովրդին պատերազմով, դրա հնարավոր վտանգը չենք օգտագործել`  ընդդիմության ձայնը լռեցնելու համար,  բայց նաև չենք ասել, որ նման վտանգ չկա: Ես դողացել եմ զինվորի կյանքի և հայրենիքի համար»,- ասաց Սարգսյանը:

Նախագահը կարևորեց նաև Սփյուռքի աջակցությունը. «Մենք պետք  է առավելագույնս օգտագործեքնք Սփյուռքի ներուժը, առաջին հերթին նրա մարդկային կապիտալը»:

Եզրափակելով ելույթը` նախագահն ասաց. «Ընտրություններով ոչինչ չի ավարտվում, այլ սկսվում է նոր փուլ: Այժմ ժամանակն է` խոսքից գործին անցնելու, ուրեմն` ի գործ, կեցցե' Հայաստանի Հանրապետությունը, փա'ռք հայ ժողովրդին»: