Նացիստը դատարանի առջեւ է կանգնել

Ամենաշատը հետախուզված նացիստ Շանդոր Կեպիրոն Հունգարիայի դատարանի առջեւ է կանգնել` Սերբիայում 1942 թվականին խաղաղ բնակիչների զանգվածային սպանությունների համար:

Ինչպես հաղորդում է BBC-ն, Հունգարիայի նախկին ոստիկանապետը մեղադրվում է Նովի Սադ քաղաքում ռազմական հանցագործություններ կատարելու մեջ: Այդ ժամանակ եռօրյա գնդակոծությունների հետեւանքով զոհվել է 1200 հրեա, սերբ եւ գնչու:

Մեղադրականում նշվում է նաեւ, որ նա անձնական պատասխանատվություն է կրում 36 հրեայի եւ սերբի սպանության համար: Նրանցից 30-ին բռնի կերպով մտցրել են բեռնատարը, տարել անհայտ ուղղությամբ եւ գնդակահարել:

Նախկին ոստիկանապետը, սակայն, կտրականապես հերքում է բոլոր մեղադրանքները: Նա նույնիսկ հայտարարում է, թե միակն է եղել, ով չի ենթարկվել «գնդակահարել» հրամանին: Կեպիրոն երկուշաբթի օրը դատարանում հայտարարել է, թե ամբողջ դատավարությունը «կրկես» է:

Շանդոր Կեպիրոն մասնակցել է նաեւ Հունգարիայում 1944 թվականի գնդակահարություններին: Պատերազմից հետո մեկնել է Արգենտինա, իսկ հայրենիք վերադարձել է միայն 1996-ին:

Իրավապաշտպանները հետախուզություն են սկսել միայն տասը տարի անց: Կեպիրոյին գտել են Բուդապեշտում` սինագոգի մոտգտնվող բնակարանում: