36 ժամ` դեֆոլտի մասին մտածելու համար

ԱՄՆ նախագահ Բարաք Օբաման Կոնգրեսից պահանջել է հուլիսի 16-ից ոչ ուշ  համաձայնության գալ պետական պարտքի չափի ավելացման վերաբերյալ:

Ինչպես տեղեկացնում է Washington Post-ը, վկայակոչելով նախագահի վարչակազմի անանուն աղբյուրը, Օբաման նման հայտարարություն է արել երեկ կոնգրեսականների հետ հանդիպման ժամանակ: Այսօր նա մտադիր է մամուլի ասուլիս հրավիրել` նվիրված երկրի բյուջեին:

Ներկայացուցիչների պալատի հանրապետական եւ դեմոկրատ ներկայացուցիչներն արդեն 5 ամիս է` չեն կարողանում համաձայնության գալ 2012 թվականի բյուջեի նախագծի վերաբերյալ:

Օբամային սատարող դեմոկրատները փորձում են բարձրացնել պետպարտքի սահմանը եւ վերացնել հարուստ ամերիկացիների հարկային արտոնությունները` հուսալով այդ միջոցառումների շնորհիվ ծածկել բյուջեի աճող դեֆիցիտը:

Հանրապետականներն այլ միջոցներ են առաջարկում` առաջին հերթին` պետական ծախսերի եւ տարատեսակ սոցիալական նպաստների կրճատում:

Բյուջեի նախագիծը պետք է համաձայնեցվի եւ նախագահի ստորագրմանը ներկայացվի մինչեւ օգոստոսի 2-ը: Հակառակ դեպքում ֆինանսների նախարարությունը ստիպված կլինի տեխնիկական դեֆոլտ հայտարարել: