Այն հայը, ով փորի մասին է մտածում, հպարտության մասին իրավունք չունի մտածելու. Գալուստ Սահակյան

Այսօր «Մայր Հայաստան» հուշարձանի մոտ անցկացվող` մայիսի 9-ի տոնակատարությունները գլխավորում էր ԱԺ նախագահ Գալուստ Սահակյանը, ով այսօր Հայաստանում առաջին դեմքն է, փաստորեն, քանի որ ՀՀ նախագահն ու վարչապետը գտնվում են Հայաստանից դուրս:

Yerkir.am-ի այն հարցին, թե հաղթանակի օրը ուրիշ ի՞նչ հաղթանակներ է խոստանում ԱԺ նախագահը հայ ժողովրդին, Գալուստ Սահակյանը պատասխանեց. «Բարդ հարց եք տալիս, էն` ինչը, որ հայ ժողովուրդն է ուզում»:

Մեր դիտարկմանը, որ հայ ժողովուրդը լավ ապրել է ուզում, պատասխանեց. «Լավ ապրելու համար պետք է լավ նախահիմքեր ստեղծել: Նախ` պետք է լավ հայ լինել, պիտի կարողանալ վճռական լինել: Լավ ապրելու համար բոլորը պետք է միավորյալ լինեն, և դրա ապացույցները մենք արդեն ունեցանք ու մեր աչքով տեսանք»:

Լրագրողների այն հարցին, թե ի՞նչ ստացան Հայրենական պատերազմի վետերանները, Գալուստ Սահակյանը պատասխանեց, որ եթե վետերաններին այդ հարցը տանք, նրանք կվիրավորվեն: «Վետերանները ստացան այն ամենը, ինչ կարողանում է մարդը ստանալ իր կյանքում, դա հպարտությունն է: Իսկ նյութականի առումով` վերջին տարիներին, իհարկե, որոշ բարեփոխումներ եղան»:

Հարցին, թե դատարկ փորով ի՞նչ հպարտություն, Գալուստ Սահակյանը պատասխանեց. «Այն հայը, ով փորի մասին է մտածում, նա հպարտության մասին իրավունք չունի մտածելու»: