Թեկնածուներից երկուսն ինքնաբացարկ են հայտնել

Կենտրոնական ընտրական հանձնաժողովի անդամների նշանակման համար օրենքով սահմանված ժամկետը լրանալուց մոտ 4 ժամ առաջ ինքնաբացարկ են հայտնել Հայաստանի մարդու իրավունքի պաշտպանի ներկայացրած երեք թեկնածուներից երկուսը` Աիդա Մուրադյանը եւ Ռոզա Ստեփանյանը:
 
Ընտրական օրենսգրքի փոփոխությունների համաձայն` ԿԸՀ երեք անդամ նշանակվում է օմբուդսմենի առաջարկությամբ, երկուսին առաջարկում է Փաստաբանների պալատը, երկուսին` Վճռաբեկ դատարանը:
 
Ինքնաբացարկ հայտարարած թեկնածուների փոխարեն օմբուդսմենն իրավունք չունի ներկայացնել մրցույթին այլ հայտ ներկայացրած անձանց:  ԿԸՀ երեք անդամները ՀՀ նախագահին եւ հանրությանը կներկայացվեն մինչեւ հուլիսի 12-ը:
 
«Հաշվի  առնելով ստեղծված բարդ իրավիճակը` խնդրում ենք չակնկալել լրացուցիչ մեկնաբանություններ եւ տեղեկություններ` մինչեւ նոր անունների առաջադրումը»,- ասված է ՄԻՊ գրասենյակի տարածած հաղորդագրության մեջ:

Նշենք, որ ՀՀ վճռաբեկ դատարանի նախագահը ՀՀ նախագահին է ներկայացրել ԿԸՀ ներկայիս նախագահ Գարեգին Ազարյանի եւ Լաուրա Գալստյանի թեկնածությունները, Փաստաբանների պալատը`  պալատի անդամ, թիվ 9 ընտրատարածքային ընտրական հանձնաժողովի քարտուղար Գեորգի Մարտիրոսյանի եւ թիվ 10 ընտրատարածքային ընտրական հանձնաժողովի նախագահ Սիլվա Մարկոսյանի թեկնածությունները, իսկ ՀՀ մարդու իրավունքների պաշտպանի ներկայացրած թեկնածուներից մնում է Արտակ Մելիքսեթյանը:

ԿԸՀ անդամները նշանակվելու են նախագահի հրամանագրով: