Ռոբերտ Քոչարյանի խափանման միջոցի փոփոխման վերաբերյալ գործով դատավորը ինքնաբացարկ է հայտնել

ՀՀ երկրորդ նախագահ Ռոբերտ Քոչարյանի նկատմամբ խափանման միջոց ընտրված կալանավորումն այլընտրանքային խափանման միջոց գրավով փոխարինելու վերաբերյալ գործով նախագահող դատավոր Նելլի Բաղդասարյանն ինքնաբացարկ է հայտնել: Այս մասին հայտնում է Քոչարյանի փաստաբանական խումբը:

Երեկ՝ հունվարի 9-ին, մեղադրանքի կողմը դատարանին ինքնաբացարակի միջնորդություն էր ներկայացրել, իսկ այսօր՝ դատավոր Բաղդասարյանը, վերադառնալով խորհրդակցական սենյակից, ինքնաբացարկ հայտնելու մասին որոշում է հրապարակել:

Հիշեցնենք նաև, որ Ռոբերտ Քոչարյանի պաշտպանները 26.12.2018 թվականին միջնորդություն են ներկայացրել դատարան՝ Ռոբերտ Քոչարյանի նկատմամբ խափանման միջոց ընտրված կալանավորումը գրավով փոխարինելու վերաբերյալ: Դատարանը, 2018թ․ դեկտեմբերի 28-ին՝ ժամը 17:00֊ին, դատական նիստ էր նշանակել, ապա աշխատանքային օրվա ավարտով պատճառաբանելով դատական նիստը հետաձգել էր և նշանակել այսօր` հունվարի 9֊ին: Նշենք նաև, որ փաստաբանական խումբը գրավի վերաբերյալ միջնորդություն ներկայացնելիս գրավի չափ չի նշել, սահմանվող գրավի չափը որոշել խնդրել է դատարանին: