Լքել է Կազանը չբավարարվա՞ծ

Երեկ նախատեսված էր, որ Կազանում Հայաստանի, Ռուսաստանի եւ Ադրբեջանի նախագահների եռակողմ բանակցությունների ավարտից անմիջապես հետո երկրների ղեկավարները պետք էին մասնակցեին Կազանի ձիարշավարանում անցկացվելիք ՌԴ նախագահի մրցանակի խաղարկությանը:

Սակայն, ինչպես հայտնում են ռուսական լրատվամիջոցները, մարզադաշտ են մեկնել միայն Դմիտրի Մեդվեդեւն ու Սերժ Սարգսյանը, իսկ Ադրբեջանի նախագահը չի ընկերացել նրանց ու անմիջապես մեկնել է Բաքու:

Հիշեցնենք, որ սա առաջին դեպքը չէ, երբ Ալիեւն կրտսերն այսպես հանկարծակի ընդհատում է որեւէ ուղեւորություն ու շտապ վերադառնում հայրենի օջախ:

Այդպես եղել է նաեւ նախորդ եռակողմ բանակցությունից: Այն ժամանակ դա բացատրվեց բանակցությունների արդյունքներից Ալիեւի դժգոհ լինելու հանգամանքով:

Վերլուծաբանները դեռ ոչինչ չեն ասել, բայց գուցե այս անգամ էլ է Ալիեւի պահվածքը պայմանավորված անբավարարվածության զգացումով: