Լքել է, չի լքել...

Եգիպտոսի նախագահ Հոսնի Մուբարաքի հեռուստաելույթը, որում նա կտրուկ հայտարարել է, թե հրաժարական չի տալու, ընդվզման նոր ալիք է բարձրացրել:

Արդեն երեկ գիշեր անկարգությունները Կահիրեում նոր թափ են ստացել: Թահրիր հրապարակում հավաքված հազարավոր մարդիկ, ովքեր դեմ են, որ Մուբարաքը իշխանությունը հանձնի փոխնախագահ Օմար Սուլեյմանին, շարժվել են դեպի նախագահական պալատ: Լուրեր են տարածվել, թե Մուբարաքն արդեն լքել է երկիրը:

Ընդդիմությունը ուրբաթ օրը մեծ ցույց է կազմակերպելու` խոստանալով, որ երկրի նախագահը, այնուամենայնիվ, ստիպված է լինելու կատարել իրենց պահանջները:

Ինչպես տեղեկացնում են ռուսաստանյան եւ իրանական ԶԼՄ-ները, ոչ պաշտոնական տվյալներով` Մուբարաքը հեռացել է երկրից, իսկ նրա գիշերային ելույթը տեսագրվել էր նախապես: Այլ տեղեկություններով` Մուբարաքը Կահիրեից մեկնել է Շարմ աշ Շեյխ` Եգիպտոսի բանակի գլխավոր շտաբի պետի ուղեկցությամբ: