Հաբսբուրգներին այլեւս չի արգելվում Ավստրիայի նախագահ ընտրվել

Ավստրիայի խորհրդարանը ձայների մեծամասնությամբ վերացրել է Առաջին համաշխարհային պատերազմից հետո ընդունված` ընտրությունների մասին օրենքի մի հոդվածը, որն արգելում էր Հաբսբուրգների կայսերական տան ներկայացուցիչներին ընտրվել պետության ղեկավարի պաշտոնում:

Այդ հոդվածը 1919 թվականի ապրիլին ընդունված առաջին դեկրետներից մեկի շարունակությունն էր, ըստ որի` որոշվել էր Համբսբուրգներին արտաքսել երկրից եւ զրկել գույքային իրավունքներից, եթե նրանք չհրաժարվեն իրենց արքայական նկրտումներից:

Ի դեպ, անցյալ տարի կայսերական դինաստիայի ներկայացուցիչներից մեկն առաջադրել էր իր թեկնածությունը նախագահական ընտրություններում, սակայն օրենքը չէր գործել, քանի որ նա բավարար քանակությամբ ստորագրություններ չէր կարողացել հավաքել իր թեկնածությունը գրանցելու համար. տեղեկացնում է ИТАР-ТАСС-ը: