Պայքարում են արեւմտյան մշակույթի ներխուժման դեմ

Իրանի իշխանությունները շարունակում են պայքարը «արեւմտյան մշակույթի ներխուժման» դեմ. այսուհետ տղամարդկանց արգելվում է վզին զարդեր կրել. տեղեկացնում է Guardian-ը:

Նոր կանոնի պահպանմանը հետեւելու են բարքերի ոստիկանության 70 հազար աշխատակիցներ: «Բարոյական անվտանգության ծրագիրը» տղամարդկանց արգելում է նաեւ կրել կիսավարտիքներ, սակայն կարճաթեւ վերնաշապիկները թույլատրվում են:

Guardian-ը գրում է, որ շոգերի հետ երկրի երիտասարդությունը ոչ միայն տուգանվելու, այլեւ ձերբակալվելու շատ հնարավորություններ է ունենալու:

«Նրանք ոչ միայն սահմանափակում են մեզ հագուստի մեջ, այլեւ վախ են սերմանում` այդքան ոստիկաններ փողոց հանելով: Դա միջամտություն է մեր անձնական կյանքին»,- հեռախոսով բողոքել է Թեհրանի մի բնակիչ:

Ի դեպ, ավելի վաղ Իրանի խորհրդարանն առաջարկել էր արգելել շներ պահելը, քանի որ շունը «պիղծ» կենդանի է, եւ շուն պահելը նշանակում է «կուրորեն հետեւել արեւմտյան պարզունակ մշակույթին»: