ԱՄՆ-ը եւ Իսրայելը հակամարտություն են սադրում

ԱՄՆ-ը եւ «սիոնիստական վարչակարգը» դավեր են նյութում` փորձելով ռազմական եւ ներքին հակամարտություններ հրահրել Մերձավոր Արեւելքում. հայտարարել է Իրանի արտգործնախարարությունը:

«Ամերիկացիները կարծում են, որ տարածաշրջանում ռազմական հակամարտության գլխավոր եւ անմիջական արդյունքը կլինի սիոնիստական վարչակարգի փրկությունը: Այդ նպատակով ԱՄՆ-ը Իսլամական Հանրապետությանը ռազմական հակամարտության է հրահրում»,- հայտարարել է Իրանի ԱԳՆ մամուլի քարտուղար Ռամին Մեհման-Փարաստը:

Սակայն, ըստ նրա, Թեհրանը կոշտ պատասխան կտա իր դեմ ուղղված ցանկացած ռազմական գործողության. «Իրանի թշնամիներն արդեն հասկացել են, որ Իսլամական Հանրապետության դեմ հարձակումը հիմարություն է եւ խելագարություն»: 

Ի դեպ, երեկ «Ֆարս» գործակալությունը տեղեկացրել է, որ «իրանական ռազմական սուզանավերը մտել են Կարմիր ծովի ջրերը` տեղեկատվության հավաքելու եւ այլ երկրների նավեր հայտնաբերելու նպատակով»: Գործակալությունը չի մանրամասնել, թե սուզանավերը քանիսն են:

«Ֆարս»-ին տված հարցազրույցում Եգիպտոսի ռազմածովային ուժերի նախկին պաշտոնյա Թալաթ Մուսլիմը հայտարարել է, որ Իրանի ներկայությունը Կարմիր եւ Միջերկրական ծովերում «բխում է մահմեդականների շահերից», քանի որ ուղղված չէ իսլամական եւ արաբական երկրների դեմ: