ՀՐԱՊԱՐԱԿ. Կրկին կադրային փոփոխություններ

Տեւական ժամանակ դադարել էին կադրային փոփոխությունների մասին լուրերը, անգամ ասում էին, թե մինչեւ խորհրդարանական ընտրություններ այլեւս փոփոխություններ չեն արվի, սակայն օրերս կրկին ակտիվացել են այդ խոսակցությունները:

Ասվում է, որ կտրուկ փոփոխություններ են սպասվում այս ամսին: Ցանկը գլխավորելու է վարչապետ Տիգրան Սարգսյանը, ում, այնուամենայնիվ, կփոխարինի Հովիկ Աբրահամյանը, որը լավ վարչարարի համարում ունի, եւ կարծում է, որ Տ. Սարգսյանի փչացրածն ինչ-որ կերպ կկարողանա շտկել, գոնե վիճակն ավելի չի վատանա:

Հեռացողների ցանկում կրկին նշվում են Արմեն Գեւորգյանի եւ, ընդհանրապես, Ռոբերտ Քոչարյանի անվան հետ կապվող անձանց անունները, այդ թվում` գլխավոր դատախազի: Ոստիկանապետը կտեղափոխվի այլ աշխատանքի:

Մեր աղբյուրները ենթադրում են, որ այս փոփոխությունները կարող են ներկայացվել որպես ՀԱԿ-ի հերթական զիջում. չէ որ պաշտոնանկությունների պահանջը ներառված էր նրանց 15 կետանոց պահանջագրում: Իսկ գերխնդիրը Քոչարյանի ուժեղացման դեմն առնելն է, ինչի վտանգը զգում է գործող իշխանությունը: