Աղտոտված հողեր

Մի շարք թունաքիմիկատների գերօգտագործումը վնասակար ազդեցություն է թողնում հողերի վրա:

«Երկիր»-ի հարցին, թե ներկա պահին Հայաստանում թունաքիմիկատներով աղտոտված որքա՞ն հողատարածք կա, ագրարային համալսարանի ագրոէկոլոգիայի ամբիոնի վարիչ Մերուժան Գալստյանը պատասխանեց. «Հայաստանում ներկա պահին առկա է 50 հազար հեկտար տեխնածին աղտոտված հողատարածք: Մոտ 100 հազար հեկտարի վրա էլ ծանր մետաղներով աղտոտվածության մակարդակը գերազանցում է թույլատրելի չափաքանակը»:

Նրա խոսքերով` հիմնականում աղտոտված են Ալավերդու, Քաջարանի պղնձամոլիբդենային կոմբինատների, Արարատյան դաշտի ոսկու հանքանյութի վերամշակման գործարանի պոչամբարի, Հրազդանի եւ Արարատի ցեմենտի գործարանների մերձակա տարածքները:

«Ծանր մետաղներով աղտոտված հողերը վտանգավոր են մարդու առողջության համար: Թունավոր նյութերը թափանցում են սննդի մեջ, ապա, մարդու օրգանիզմ անցնելով, կարող են քաղցկեղի եւ այլ հիվանդությունների պատճառ դառնալ»,- ասաց Մ. Գալստյանը:

Գյուղոլորտում  չափազանց շատ օգտագործվող ազոտական պարարտանյութին անդրադառնալով` նա նշեց, որ այն հողը չի աղտոտում, սակայն չարաշահման հետեւանքով սննդի հետ նիտրատները օրգանիզմ են թափանցում ու կարող են առողջությանը վնաս պատճառել:

Հողի աղտոտման աղբյուրներից ագրոէկոլոգն առանձնացրեց նաեւ ավտոմոբիլային տրանսպորտի արտանետումները. «1990-ականների կեսերին կառավորությունն իր հատուկ որոշմամբ արգելեց կապարացված բենզինի օգտագործումը Հայաստանի տարածքում, իսկ կապարն ամենավտանգավոր ծանր մետաղներից է: 2000-ականների սկզբերին արված ուսումնասիրությունները ցույց տվեցին, որ անգամ տեղացած ձյան մեջ կապար կա»: