14 տոննա աղտոտված ձու է ներկրվել Բրիտանիա

Դիոքսինով աղտոտված 14 տոննա ձու է Հոլանդիայից ներկրվել Միացյալ Թագավորություն: Դեկտմբերի 12-ին ներմուծված այս ձվերը պետք է օգտագործվեն մայոնեզի եւ խմորեղենի պատրաստման համար:

Սննդի չափանիշների գործակալությունը երեկ հայտնել է, թե ձվերի աղտոտվածության աստիճանն այնքան ցածր է, որ չի կարող սպառնալ մարդու առողջությանը: Սակայն անհնար է համոզվել, թե արդյո՞ք այդ ձուն չի վաճառվել մարդկանց:

Աղտոտումը տեղի է ունեցել Գերմանիայում, երբ դիոքսինով աղտոտված 3000 տոննա կեր են ուղարկել մոտ 1000 թռնաբուծական եւ անասնաբուծական ֆերմաներ: Որոշ թռնաֆաբրիկաներից ձվերը վերամշակման համար ուղարկել են  Հոլանդիա:

Հայտնաբերվել է, որ Գերմանիայում արտադրված այդ ձվերը պարունակում են հինգ անգամ ավելի շատ դիոքսին, քան թույլատրում է ԵՄ օրենսդրությունը:

Դիոքսին թույնը առաջանում է թափոնների այրումից եւ արտադրական այլ գործընթացների արդյունքում: Այն պարունակում է քաղցկեղածին տարրեր եւ խիստ վտանգավոր է հղի կանանց համար:

Սննդի չափանիշների գործակալությունը հայտնել է նաեւ, որ թեեւ ներկրված ձվերում պարունակվող դիոքսինը վտանգավոր չէ մարդու առողջության համար, սակայն երկար ժամանակ նման սնունդ օգտագործելու դեպքում այն իր բացասական ազդեցությունը կունենա:

Այս մասին հաղորդում է «Թելեգրաֆը»: