Վարչապետը ՀՅԴ-ից նեղացած չէ

ԱԺ-կառավարություն հարցուպատասխանից հետո արդեն ավանդական դարձած ճեպազրույցի ընթացքում վարչապետ Տիգրան Սարգսյանը նշեց, որ ՀՅԴ-ից նեղացած չէ եւ ոչ մի «կոմպրոմատ» էլ չի պատրաստում:

«Ես բացարձակապես չեմ նեղվում Դաշնակցության հարցերից: Նրանք մեր գործընկերներն են, շատ  հարգալից վերաբերմունք ունեմ նրանց նկատմամբ: Հարցապնդումը ստանալուց հետո նրանց հրավիրել եմ, տեղի է ունեցել քննարկում, եւ դա նորմալ ու բնական երկխոսություն է, եւ նեղվելու բան չկա»,- ասաց վարչապետը:

Տիգրան Սարգսյանը անդրադարձավ նաեւ մեղադրանքներին, թե կառավարությունը փորձում է մեղքը բարդել նախորդ կառավարությունների վրա: Ի դեպ, սրան արձագանքել էր նաեւ ԱԺ նախագահ Հովիկ Աբրահամյանը` ասելով, որ «դա արդար չէ»:

Նա նշեց, որ իրենք իրենց չեն տարանջատում նախորդ կառավարություններից: «Մենք կիսում ենք նախորդների պատասխանատվությունը եւ պատասխանատու ենք թե' լավ ձեռքբերումների, թե' բացթողումների համար»:

Իսկ իր կառավարությանն անվստահություն հայտնելու` ՀՅԴ-ի ցանկությունը վարչապետը համարում է նորմալ երեւույթ ու  քաղաքական պայքարի ձեւ: «Նպատակն է բարձրացնել իրենց կուսակցության հեղինակությունը, որպեսզի հաջորդ ընտրությունների ժամանակ վայելեն ժողովրդի վստահությունը եւ քվեներ ստանան: Սա նորմալ քաղաքական պայքարի ձեւ է»,- ասաց նա: