Մի օր էլ հուշահամալիրի անմար կրակի վրա խորոված կանենք

Facebook սոցիալական ցանցում ստեղծվել է խումբ, որը կոչ է անում բոլոր նրանց, ովքեր «սխալ են համարում մեր երկրի գլխավոր հրապարակը որևէ մի «աստղի» համար համերգասրահ դարձնելը», միանալ իրենց` ասելով. «Ես չեմ գնալու Հանրապետության հրապարակ` մայիսի 22-ին»:

Մայիսի 22-ին Արման Հովհաննիսյանը համերգ է տալու Հանրապետության հրապարակում:

«Ես չեմ գնալու Հանրապետության հրապարակ» խմբին միացել է արդեն 355 մարդ, ովքեր նաեւ ակտիվ մեկնաբանում են երեւույթը:

Գրիգոր Ամիրյանը գրում է. «...ու ընդհանրապես ես մեր շոու բիզնեսից ոչ մեկի համերգին էլ չեմ գնում, այ մարդ, լինի դա հրապարակում, թե գեղի կլուբում: Ես գործեր ունեմ, հազար ու մի բան ..., ավելի լավ ա նստեմ անգլ սովորեմ, մի 50 նոր բառ կսովորեմ էտ ընթացքում, հաստատ ավելի օգուտ ա»:

Իսկ, ահա, Արփենիկ Հակոբյանը զայրացած է նման որոշման դեմ, որ համերգն անցկացվի հրապարակում, նաեւ սոցցանցում ստեղծված խմբի դեմ: «Էնքան պարապ եք մնացել, որ արդեն Facebook-ում եք իրար դավադիտ անում: Սպանեցիք-թողեցիք: Չեք գնում, մի' գնացեք: Գնացեք ձեր քաղաքը կառավարողներին բողոքեք: Կարող ա՞ գիտեք` ձեր հավեսն ունենք: Ո'չ համերգն ա մի բան, ո'չ էլ դուք»,- գրում է Արփենիկը:

Մեկ ուրիշ մասնակից նկատում է, որ Պանթեոնի մոտ դելֆինարիում են կառուցում, Մեծ եղեռնի հուշահամալիրի տակ` խորովածանոցներ. «Սենց որ գնա, հուշահամալիրի անմար կրակի վրա էլ մի օր խորոված կանենք»...