Ճապոնիան բողոքի նոտա է հղել Ռուսաստանին

Այսօր Ճապոնիայի արտգործնախարար Տակեակի Մացումոտոն Ռուսաստանի փոխվարչապետ Սերգեյ Իվանովի` Հարավային Կուրիլներ այցելության կապակցությամբ բողոքի նոտա է հղել Տոկիոյում ՌԴ դեսպանին, որն այդ նպատակով կանչվել է նախարարություն:

«Դա վիրավորում է մեր ժողովրդի զգացմունքները եւ հիասթափություն է առաջացնում»,- ասել է նախարարը:

Կիրակի օրը Իվանովն այցելել է Կուրիլյան կղզիներ` այդ տարածքների սոցիալ-տնտեսական զարգացման դաշնային նպատակային ծրագրի իրականցման աշխատանքներին հետեւելու: Այցին մասնակցել են տրանսպորտի նախարար Իգոր Լեւիտինը, տնտեսական զարգացման նախարար Էլվիրա Նաբիուլլինան, բնական պաշարների նախարար Յուրի Տրուտնեւը, տարածքային զարգացման նախարար Վիկտոր Բասարգինը, Սախալինի նահանգապետ Ալեքսանդր Խորոշավինը:

Ճապոնիայի կառավարությունը շատ կտրուկ է արձագանքում ռուսաստանցի բարձրաստիճան պաշտոնյաների` Հարավային Կուրիլներ յուրաքանչյուր այցին: Ճապոնացիները, որոնք կղզիները համարում են իրենց հյուսիսային տարածքներ, պնդում են, որ այցերը վատթարացնում է կղզիների պատկանելության հարցի վերաբերյալ բանակցությունները: