Եվրախորհրդարանը խստորեն դատապարտել է Ադրբեջանին

Երեկ լիագումար նիստում Եվրախորհրդարանը խստորեն դատապարտել է Ադրբեջանի իշխանություններին մարդու իրավունքները, հանրահավաքների եւ խոսքի ազատությունները սահմանափակելու համար:

Եվրախորհրդարանում ներկայացված բոլոր քաղաքական խմբավորումների ներկայացուցիչները շեշտել են, որ Եվրամիությունը ադրբեջանական նավթի դիմաց հանդուրժող չպիտի լինեն Ալիեւի վարչակազմի նկատմամբ:

«Հիմնարար ազատություններ, մարդու իրավունքներ եւ ժողովրդավարություն» թեմայով քննարկումների ժամանակ միաձայն ընդունվել է բանաձեւ, որը դատապարտում է Ադրբեջանում հակակառավարական ցույցերի մասնակիցների դեմ իրականացված բռնությունները, ձերբակալությունները, անհիմն փաստերով արագ դատավարությունները: Բանաձեւում նաեւ կոչ է արվում Ադրբեջանի իշխանություններին` անմիջապես ազատ արձակել քաղբանտարկյալներին, երաշխավորել խոսքի եւ խաղաղ հանրահավաքների անցկացման ազատությունը: