Կահիրեում պարեկային ժամ է հայտարարվել

Արաբական հեղափոխությունները զարգանում են նույն տխուր եւ նախապես կանխորոշված սցենարով:

Դրանց կարգախոսներից մեկը արտակարգ դրության վերացումն էր ` թե' Թունիսում, թե' Եգիպտոսում: «Բռնատիրությունների նկատմամբ ժողովրդական ուժերի հաղթանակից» երկու ամիս անց` մեկ օր տարբերությամբ, «հեղափոխական» վարչակազմերը պարեկային ժամ են հայտարարել` մայիսի 7-ին` Թունիսում, մայիսի 8-ին` Եգիպտոսում:

Կահիրեում պարեկային ժամը մտցվել է այն բանից հետո, երբ մահմեդականների եւ ղպտիների բախումների հետեւանքով զոհվել է 12 մարդ, 230-ը վիրավորվել են, հրդեհվել է ղպտիական եկեղեցի եւ մի քանի բնակելի տներ:

Եկեղեցու մոխրացած ավերակների մոտ եգիպտական բանակի պահակակետեր են կանգնեցվել` նոր հարձակումները կանխելու համար: Ստեղծված իրադրության հետեւանքով Եգիպտոսի վարչապետ Էսամ Շարաֆը հետաձգել է այցը Բահրեյն:

Ձերբակալվել է անկարգությունների 190 կազմակերպիչ, բոլորն էլ կանգնելու են զինվորական դատարանի առջեւ: