ՀԱԿ-ը կլինի խորհրդարանում

ԱԺ նախագահ Հովիկ Աբրահամյանի համոզմամբ` 2012-ին ՀԱԿ-ը կմտնի խորհրդարան, սակայն թե քանի՞ տեղ կունենա, դա կորոշի ժողովուրդը:

Անդրադառնալով ՀԱԿ-իշխանություն երկխոսությանը` Հովիկ Աբրահամյանը նշեց, որ ինքը համագործակցություն տեսնում է եւ ողջունում է դա: «Յուրաքանչյուր համագործակցություն կբխի ժողովրդի եւ պետության շահերից: Ես միշտ առաջարկել եմ, որ ԱԺ ամբիոնը դարձնենք քննարկումների եւ քննադատությունների ամբիոն: Ճիշտ կլինի փողոցներից վերադառնալ եւ քննարկել յուրաքանչյուր բարեփոխում, խնդիր: Եթե կան ողջամիտ տեսակետներ, իշխանություն միշտ պատրաստ է լսել դրանք»,- ասաց ԱԺ ղեկավարը:

Հովիկ Աբրահամյանը հիշեցրեց, որ 2012-ին եւ 2013-ին Հայաստանում խորհրդարանական եւ նախագահական ընտրություններ են լինելու. «Մենք ամեն ինչ պիտի անենք, որ այդ ընտրություններն անցնեն արդար եւ թափանցիկ, որ վերականգնվի ժողովրդի հավատն իշխանությունների նկատմամբ»:

Պատասխանելով արտահերթ ընտրություններ անցկացնելու հավանականության մասին հարցին` ԱԺ նախագահն ասաց, որ յուրաքանչյուր արտահերթ ընտրություն բացասական վարկանիշ է բերում երկրին: «Արտահերթ ընտրության անհրաժեշտություն չկա, քանի որ մնացել է մեկ տարի, եւ դա շատ քիչ ժամանակահատված է պատրաստվելու համար»,- ասաց նա` խորհուրդ տալով նախապատրաստվել ընթացիկ ընտրություններին: