Բաղդադի բանտում սպանվել է "Ալ Քաիդա"-ի առաջնորդներից մեկը

Բաղդադի բանտում տեղի ունեցած հուզումների հետեւանքով զոհվել է 17 մարդ` 6 ոստիկան եւ 11 բանտարկյալ. տեղեկացնում է Associated Pressը` վկայակոչելով Իրաքի պաշտպանության նախարարության աղբյուրը:

Սպանված բանտարկյալներից մեկը «Ալ Քաիդա»-ի տեղական կառույցի առաջնորդներից է` Հութաիֆա ալ Բաթավին:

Բանտարկյալների եւ բանտապահների բախումները սկսվել են այն բանից հետո, երբ ալ Բաթավին, որը մեղադրվում է անցյալ տարի Բաղդադի եկեղեցու վրա հարձակման եւ այդ ժամանակ 52 մարդու զոհվելու համար, հարցաքննության ժամանակ ոստիկանից խլել է նրա ատրճանակը: Արդյունքում մի խումբ բանտարկյալներ իրենց վերահսկողության տակ են վերցրել բանտի մի մասը: Իրաքի ներքին գործերի նախարարության տվյալներով` հուզումների հեղինակները սպանվել են: