NYT-ն հայտնել է Թեհրանում «Ալ Քաիդա»-ի առաջնորդներից մեկին վերացնելու մասին

«Ալ Քաիդա» ահաբեկչական կազմակերպության ղեկավարներից մեկը՝ Աբդուլլահ Ահմեդ Աբդուլլան, որը 1998 թ. ներգրավված էր Աֆրիկայում ամերիկյան դեսպանատների վրա հարձակումների մեջ, երեք ամիս առաջ ոչնչացվել է իսրայելցի գործակալների կողմից Թեհրանում. հայտնում է New York Times-ը՝ վկայակոչելով հետախուզության պաշտոնյաներին:

Հաղորդվում է, որ Աբդուլլահ Ահմեդ Աբդուլլան Թեհրանի փողոցներից մեկում գնդակահարվել է մոտոցիկլետ վարող երկու տղամարդկանց կողմից օգոստոսի 7-ին՝ Տանզանիայում և Քենիայում ԱՄՆ դեսպանատների ռմբակոծությունների տարելիցի օրը: Նա սպանվել է դստեր՝ Միրիամի՝ Ուսամա բեն Լադենի որդու այրիի հետ:

Ըստ աղբյուրների ՝ հարձակումն իրականացրել են իսրայելական հետախուզության սպաները՝ ԱՄՆ-ի նախաձեռնությամբ:

Պարբերականը նշում է, որ Աբդուլլահ Ահմեդ Աբդուլլահի մահը դեռ պաշտոնապես չի հաստատվել: «Ալ Քաիդա»-ն չի հաղորդել իր ղեկավարներից որևէ մեկի մահվան մասին, Իրանի իշխանությունները չեն հայտնել որևէ վերացման մասին, իսկ որևէ այլ երկիր պատասխանատվություն չի ստանձնել:

ԱՄՆ հետախուզության պաշտոնյաները թերթին հայտնել են, որ Աբդուլլահ Ահմեդ Աբդուլան 2003 թվականից Իրանում «անազատության մեջ է», բայց 2015 թվականից ազատ ապրում է Թեհրանի արվարձաններում:

1998-ի օգոստոսի 7-ին Նայրոբիում և Դար էս Սալամում ԱՄՆ դեսպանատներում տեղի ունեցած պայթյունների արդյունքում զոհվել էր 224 մարդ, ավելի քան 4 հազարը` վիրավորվել: Թեև հարձակումներն ուղղված էին ամերիկյան դեսպանատների դեմ, մահացածներից միայն 12-ն էին ամերիկացի: