Դադարեցրե՛ք Կաթողիկեի այլանդակումը` ՀԻՄԱ

Երևանի կենտրոնում գտնվող` բազմաթիվ երկրաշարժերի և խորհրդային աղացին դիմակայած Ս. Աստվածածին (Կաթողիկե) եկեղեցին (13-րդ դ.) այսօր վտանգված է: Այս անգամ խոսքը ոչ թե քանդելու մասին է, այլ` պատմական միջավայրի աղճատման. հայտնում են Facebook-ում արդեն 650 մասնակից ունեցող «Դադարեցրեք Կաթողիկեի այլանդակումը` ՀԻՄԱ» խմբի անդամները:

Նոր նախագծով նախատեսվում է փոքրածավալ Կաթողիկեին կից կառուցել տասնապատիկ անգամ ավելի մեծ Ս. Աննա եկեղեցին, իսկ մի քանի մետր հեռավորության վրա` կաթողիկոսի երևանյան նստավայրը: Շինարարական աշխատանքներն արդեն սկսվել են:

Խմբի անդամները պնդում են, որ թե' նոր եկեղեցու, թե' նոր նստավայրի դեպքում կիրառվել է բավական ակտիվ ճարտարապետություն, որը ճնշում է փոքրածավալ ու զուսպ ճարտարապետությամբ Կաթողիկե եկեղեցուն:

«Պահանջում ենք անհապաղ դադարեցնել շինարարությունը և մշակել տարածքի բարեկարգման ավելի ընդունելի նախագիծ»,- նշված է խմբի տարածած հայտարարության մեջ: