Ֆրանսիան չի ընդունում Իտալիայից ժամանած գնացքները

Ֆրանսիայի իշխանությունները արգելափակել են Իտալիայից ժամանող գնացքների մուտքը` չցանկանալով ընդունել Իտալիայի հարավային շրջաններից տեղափոխվող թունիսցի փախստականներին. տեղեկացնում է «Ֆրանս պրես» գործակալությունը:

Իտալիայի արտգործնախարարությունը բողոքի նոտա է հղել Ֆրանսիային, իսկ երկրի ներքին գործերի նախարար Ռոբերտո Մարոնին հայտարարել է, որ այդ գործողություններն անօրինական են և խախտում են Եվրամիության հիմնարար սկզբունքները:

Ֆրանսիացիներն արդարանում են` նշելով, որ խնդիրն իբր տեխնիկական է, նաև` թե «Ֆրանսիայի սահմանից 7 կմ հեռու տեղի են ունենում բողոքի ակցիաներ, որոնց մասնակցում են Ֆրանսիայի և Իտալիայի քաղաքացիներ»:

Թունիսում և Լիբիայում տեղի ունեցած անկարգություններից հետո Իտալիայի հարավային շրջաններ, հիմնականում Լամպեդուզ կղզի բազմաթիվ փախստականներ են ժամանել: Օրերս Իտալիայի իշխանությունները որոշում են կայացրել մինչեւ որոշակի ժամկետը ժամանածներին ժամանակավոր կեցության իրավունք տրամադրել, մյուսներին` վերադարձնել իրենց երկրները: