Երջանկության բանալին

Այսօր Լոնդոնում ստեղծվել է «Հանուն երջանկության» (Action For Happiness) շարժումը, որի նպատակն է փոխել մարդկանց վերաբերմունքը կյանքի եւ սեփական անձի նկատմամբ. տեղեկացնում է ԻՏԱՌ-ՏԱՍՍ-ը:

Կազմակերպիչների տվյալներով` այսօր կազմակերպության անդամ է դարձել 4 500 մարդ աշխարհի մոտ 60 երկրից:

«Չնայած վերջին 5 տասնամյակի զգալի նյութական առաջընթացին`մարդիկ ավելի երջանիկ չեն դարձել, ընդհակառակը` նոր հոգսեր ու հիասթափություններ են ի հայտ եկել: Շարժման նպատակն այդ ամենը փոխելն է»,- ասել է կազմակերպության ներկայացուցիչներից մեկը:

Նա նաեւ հայտարարել է, որ շարժումը հիմնված է նոր գիտական մշակումների վրա, որոնք հնարավորություն են տալու մարդուն հայտնաբերել «երջանկության նոր աղբյուրներ»: Հայտնի է, որ նոր շարժման նախաձեռնողական խմբում Մեծ Բրիտանիայի գիտական աշխարհի ներկայացուցիչներ են: