ԺԱՄԱՆԱԿ. Միջազգային սկանդալի վտանգի առաջ

Ապրիլի 8-ին Կիեւ է մեկնում Հայաստանի արտգործնախարար Էդվարդ Նալբանդյանը, ով այնտեղ կմասնակցի ԱՊՀ արտգործնախարարների խորհրդի նիստին: Սակայն Նալբանդյանի կիեւյան այցելության բուն թեման, ամենայն հավանականությամբ, կլինի բոլորովին այլ խնդիր, որն առնչություն ունի ոչ թե ԱՊՀ, այլ պատգամավոր Սամվել Ալեքսանյանի գործերի հետ:

Խոսքը վերաբերում է օղիների արտադրությանը, որը կարող է դառնալ արդեն միջազգային աղմուկի պատճառ: Բանն այն է, որ Սամվել Ալեքսանյանին պատկանող ընկերությունն արտադրում է օղիներ, որոնք շատ նման են Հայաստան ներկրվող ուկրաինական արտադրության օղիներին` շփոթության աստիճան նման, ինչը, որպես փաստ, արձանագրել ու Ալեքսանյանին տուգանել էր նաեւ Հայաստանի տնտեսական մրցակցության պաշտպանության հանձնաժողովը:

Բայց Ալեքսանյանը դատական կարգով բողոքարկում է հանձնաժողովի որոշումը ու շարունակում օղիների` շփոթության աստիճան նման արտադրությունը: Իսկ ուկրաինական կողմը շարունակում է բողոքել, ինչպես երեւում է` առայժմ ապարդյուն: