Ստեփանակերտի օդանավակայանի բացումը հետաձգվում է

Պաշտոնական տեղեկատվության, թե Ստեփանակերտի օդանավակայանի բացումը տեղի է ունենալու մայիսի 9-ին, ԼՂՀ իշխանությունները չեն տվել, սակայն, «բացի տեխնիկական խնդիրներից, օդանավակայանի բացման համար այլ խոչընդոտների չկան». «Կավկազսկի ուզել» էլեկտրոնային թերթին հայտնել է ԼՂՀ նախագահ մամուլի քարտուղար Դավիթ Բաբայանը:

Ըստ նրա, իհարկե, ցանկություն է եղել բացումը կատարել մայիսի 9-ին` Հաղթանակի եւ Շուշիի ազատագրման օրը, սակայն «դա շատ բարդ գործընթաց է, հարկավոր է ամբողջությամբ պատրաստ լինել, որպեսզի ոչ մի տեխնիկական բացթողում չլինի»:

«Այդ պատճառով բացման ժամկետները մի քանի անգամ վերանայվել են. սկզբում ցանկանում էինք այն բացել 2010 թվականի հոկտեմբեր-նոյեմբերին եւ այլն: Սակայն այս տարի օդանավակայանն անպայման կբացվի` ոչ մայիսի 9-ին, ավելի ուշ»,- ասել է Դ. Բաբայանը եւ ընդգծել, որ պատճառները զուտ տեխնիկական են եւ «ոչ մի կապ չունեն Ադրբեջանի սպառնալիքների հետ»:

ԼՂՀ քաղաքացիական ավիացիայի վարչության պետ Վալերի Ադբաշյանը նույնպես ասել է, որ մայիսի 9-ին օդանավակայանը բացելու մասին լուրը ինչ-որ մեկը տարածել է, ու այդպես շարունակվել է: «Ես նման ամսաթիվ երբեւէ չեմ հայտարարել»,- նշել է նա: Ըստ Ադբաշյանի` ճշգրիտ ժամկետներ չկան, սակայն հնարավոր է` օդանավակայանը սկսի գործել ամռան սկզբին: