ԵԽ գլխավոր քարտուղարը` Ստեփանակերտի օդանավակայանի մասին

Եվրոպայի խորհուրդն անմիջական դերակատարություն չունի Ղարաբաղյան հակամարտության կարգավորման գործում, սակայն դրա կարգավորումը շատ կարեւոր է ԵԽ անդամ երկու երկրների համար, որոնք պետք է նաեւ կարեւոր համարեն ժողովրդավարությունն ու օրենքի գերակայությունը: Այդ մասին, ըստ ադրբեջանական APA գործակալության, ասել է Եվրոպայի խորհրդի գլխավոր քարտուղար Թորնբյորն Յագլանդը`  պատասխանելով ԵԽԽՎ-ում ադրբեջանական պտվիրակության անդամի հարցին, որը վերաբերել է Ստեփանակերտի օդանավակայանի շահագործմանը:

Յագլանդը վստահություն է հայտնել, որ խաղաղության հասնելու, հակամարտությունը կարգավորելու համար անհրաժեշտ է ամրապնդել մարդու իրավունքները: «Որտեղ էլ լինի, առաջին հերթին անհրաժեշտ է ապահովել մարդու իրավունքների պաշտպանությունը, ստեղծել արդարադատության համակարգ: Ինչպես մյուս եվրոպական ժողովուրդներին, բոլոր մարդկանց, ժողովուրդներին մարդու իրավունքները պետք է տրվեն հավասարապես: Մենք հետագայում էլ կշարունակենք աշխատանքը Ադրբեջանի եւ Հայաստանի հետ»,- ասել է ԵԽ գլխավոր քարտուղարը: