Փաստորեն, պայմանավորվե՞լ են...

«Ես գիտեմ, որ ձեզնից շատերը ինձ «պապի» են ասում, և դա ինձ համար ամենամեծ պատիվն է».  Ազատության հրապարակում ՀԱԿ առաջնորդ Լևոն Տեր-Պետրոսյանը ժողովրդին ասաց, որ ինքը  թողնում է հանրահավաքային հռետորաբանությունը և ժողովրդին դիմում` որպես պապիկ։

«Այսօր մենք և ժողովուրդը մեծ գործ ենք անում և միգուցե կերտում ենք այս երկրի սուրբ հողի ճակատագիրը։ Հակվեք այս գիտակցությամբ: Սա մեկ օրվա լուծելու խնդիր չէ, բայց երկար էլ չի տևելու»,- ասաց նա:

 «Մենք գիտենք ձեր հույզերը, տրամադրությունները։ Դա հրաշք է, դա մեզ նոր լիցք է տալիս»,- նշեց ՀԱԿ առաջնորդ եւ հիշեցրեց, որ այսօր իշխանությանն է առաջարկել այս փուլի համար երեք կետից բաղկացած ծրագիր, դրանք են՝ քաղբանտարկյալների ազատ արձակում, Ազատության հրապարակում արտոնված հանրահավաքների իրականացում և մարտմեկյան դեպքերի բացահայտում ու մեղավորների պատժում։ Լեւոն Տեր Պետրոսյանը վստահեցրեց`  բոլոր կետերն էլ  իրականանալու են։

Ելույթի ավարտին Լեւոն Տեր-Պետրոսյանը շեշտեց, որ 2008 թ. մարտյան դեպքերից հետո սա «ժողովրդի առաջին լիաթոք ցնծությունն է»։

«Մաղթում եմ ձեզ մշտական ցնծություն»,- ասաց Տեր-Պետրոսյանը և բարի գիշեր մաղթեց հավաքվածներին։

Ի դեպ,  Լևոն Տեր-Պետրոսյանը Ազատության հրապարակում չմոտեցավ նույն հրապարակում արդեն երրորդ օրը հացադուլ անցկացնող Րաֆֆի Հովհաննիսյանին։