Չարենցի կյանքի թռիչքը...

Իմ աչքերի մեջ այնքա՜ն կրակներ եմ մարել ես

Եվ հոգուս մեջ, հուսահատ, այնքան աստղեր եմ մարել:

Կյանքս, որ հուշ է դարձել, հեռանալիս չանիծես.

Կյանքս կանցնի, կմարի - բայց երգս կա, կապրի դեռ:

Մարտի 13-ին լրանում է հայ մեծանուն բանաստեղծ Եղիշե Չարենցի ծննդյան 114-ամյակը: Չարենցը ծնվել է 1897թ. Կարսում: Գրականագետներից յուրաքանչյուրը Չարենց գրական անվան իր տարբերակն է առաջարկում:

Չարենցը Գուրգեն Մահարուն պատմել է, թե Կարս էր եկել Չարենց ազգանունով մի բժիշկ, որի ցուցատախտակի «Չարենց» մակագրությունն էլ վերցրել է:

Ըստ Կարինե Քոթանջյանի` բանաստեղծը Չարենց է մկրտվել, որովհետեւ մանկուց եղել է չար երեխա: Նրան այնքան են չար ասել, որ Չարենց էլ մնացել է:

Իսկ Անուշավան Ջիդեջյանը /Վիվան/ վկայել է, որ Չարենց անունն առաջացել է Ալեքսանդր Պուշկինի «Անչար» ոտանավորի հնչունական տեղաշարժերի հետեւանքով:

ՀՀ մշակույթի նախարարության հասարակայնության հետ կապերի վարչության պատասխանատու Գայանե Դուրգարյանը նշեց, որ մարտի 13-ին նախատեսվում է այցելություն բանաստեղծի հուշարձանին, որտեղ կանցկացվի պոեզիայի տոն` դպրոցականների մասնակցությամբ: Միջոցառումներ են նախատեսվում նաեւ Եղիշե Չարենցի տուն-թանգարանում, որտեղ կբացվի «Երկիր Նաիրի» խորագրով ցուցահանդես: Կցուցադրվեն Չարենցի «Երկիր Նաիրի» վեպի` Մ. Սարյանի, Հովհ. Շավարշի, Կ. Սմբատյանի, Մ. Արուտչյանի, Ա. Բեքարյանի ձեւավորումները:

Կկայանա նաեւ «Ե.Չարենցի տեքստերով հայ կոմպոզիտորների երգեր» խորագրով համերգ. ՀՀ ժողովրդական արտիստ Ազատ Գասպարյանը հանդես կգա Ե. Չարենցի ստեղծագործությունների կատարմամբ: Մուտքն ազատ է:

Նշենք նաեւ, որ մի շարք մտավորականներ, չարենցապաշտներ, Գրողների միությունը, Չարենցի տուն-թանգարանը, ինչպես նաեւ մշակույթի նախարարությունը ցանկանում են Չարենցի արձանի մերձակա այգին անվանել Պոեզիայի այգի: