ԼՂՀ նախագահի հանդիպումները՝ Ֆրանսիայում

Երեկ Արցախի նախագահ Բակո Սահակյանը Փարիզում հանդիպում է ունեցել «Հայաստան» համահայկական հիմնադրամի Ֆրանսիայի մասնաճյուղի տնօրեն Պետրոս Թերզյանի եւ նույն կառույցի անդամ Ռոբերտ Հայդադիրյանի հետ:

Ինչպես տեղեկացնում են նախագահի աշխատակազմի տեղեկատվության գլխավոր վարչությունից, հանդիպման ընթացքում քննարկվել են Արցախում հիմնադրամի կողմից իրականացվող տարբեր ծրագրերին վերաբերող հարցեր: Հատուկ ուշադրություն է դարձվել Շուշի քաղաքում արհեստագործական ուսումնարանի կառուցման հետ կապված հարցերին:

Երկրի ղեկավարը երախտագիտություն է հայտնել «Հայաստան» համահայկական հիմնադրամի Ֆրանսիայի մասնաճյուղին` Արցախին մշտապես սատարելու համար եւ ընդգծել ուսումնարանի նշանակությունը ինչպես Շուշիի, այնպես էլ ամբողջ հանրապետության համար որակյալ  մասնագետների պատրաստման տեսանկյունից:

Նույն օրը նախագահը Փարիզում հանդիպում է ունեցել նաեւ Եվրոպայի Հայ Դատի հանձնախմբի ատենապետուհի Հիլդա Չոբոյանի հետ, քննարկվել են եվրոպական երկրներում Արցախյան հիմնախնդրի ճշմարտացի լուսաբանման եւ Հայրենիք-Սփյուռք կապերի խորացման հետ կապված հարցեր:

Բակո Սահակյանը կարեւորել է Սփյուռքում համահայկական նշանակություն ունեցող հարցերի շուրջ բոլոր հայկական քաղաքական ուժերի եւ կազմակերպությունների համախմբման եւ Հայրենիքի հետ սերտ համագործակցության անհրաժեշտությունը` այն համարելով համազգային նպատակների հասնելու լավագույն միջոց: