Ղարաբաղում բնակարանների գներն աճել են

Անցյալ տարի Ղարաբաղի բազմաբնակարան շենքերում վաճառվել է 184 բնակարան, նաեւ 166 առանձնատուն՝ 2009-ի, համապատասխանաբար, 204-ի եւ 181-ի փոխարեն:

Ի դեպ, 196 բնակարան եւ առանձնատուն վաճառվել է Ստեփանակերտում, 47-ը` Շուշիում: ԼՂՀ կառավարությանն առընթեր անշարժ գույքի կադաստրի պետական կոմիտեի տվյալներով` վաճառված 1 սենյականոց բնակարանի պայմանագրային միջին արժեքը 6822.3 հազար դրամ է, 2 սենյականոցինը՝ 10375.7, 3 սենյականոցինը՝ 16509.5, 4 եւ ավելի սենյականոցինը՝ 2784.0 հազար դրամ, իսկ առանձնատներինը՝ 28533.1 հազար դրամ:

Շրջաններում ամենաբարձր գները Շուշիում են, ամենացածրը` Քաշաթաղի եւ Հադրութի շրջաններում:

Վաճառված բնակարանների (առանձնատների) 1 քառ. մետրի պայմանագրային միջին արժեքը Ստեփանակերտի բազմաբնակարան շենքերում կազմել է 212.7 հազար դրամ, իսկ առանձնատներինը՝ 114.0 հազար դրամ:

Բնակարանների առք ու վաճառքի մասին տվյալների համաձայն` 2009 թվականի համեմատ բնակարանների մեկ քառ. մետրի միջին կադաստրային արժեքն ավելացել է 6.3 տոկոսով, առանձնատներինը՝ 2.6 անգամ, իսկ, ըստ նոտարական գրասենյակի, պայմանագրային արժեքը, համապատասխանաբար, 39.2 տոկոսով եւ 3.4 անգամ:

Հետաքրքրական է այն, որ 2010 թվականին ԼՂՀ ոչ ռեզիդենտներին բնակարան չի վաճառվել: