ՉՈՐՐՈՐԴ ԻՆՔՆԻՇԽԱՆՈՒԹՅՈՒՆ. "Հետքի" դիմումը դատախազությունում է

ՀՀ գլխավոր դատախազության հանրային կապերի պետ Շահեն Տոնոյանից երեկ հետաքրքրվեցինք` ստացե՞լ են իրենք «Հետք» էլեկտրոնային կայքի պատվիրված նամակը` ուղղված գլխավոր դատախազ Աղվան Հովսեփյանին, թե՞ ոչ: Շահեն Տոնոյանն ասաց, որ իրենք ստացել են թե' նամակը, թե' լրագրողի եւ ԱԺ պատգամավոր Ռուբեն Հայրապետյանի հետ հեռախոսազրույցի ձայնագրությունը: «Պատասխանելու սահմանված ժամկետներ կան, մենք էլ այդ ժամկետներում կպատասխանենք»,- փոխանցեց Տոնոյանը:

Հիշեցնենք, որ Ռուբեն Հայրապետյանը հայհոյել էր լրագրողին, որից հետո լրատվամիջոցը ԱԺ ՀՀԿ-ական պատգամավորի մասով հաղորդում էր ներկայացրել դատախազին: «Հետաքննող լրագրողներ» ՀԿ նախագահ, «Հետք» թերթի գլխավոր խմբագիր Էդիկ Բաղդասարյանի ու թերթի լրագրող Գրիշա Բալասանյանի համոզմամբ` պատգամավորը ակնհայտ խոչընդոտել է լրագրողի մասնագիտական օրինական գործունեությունը` ՀՀ Քրեական օրենսգրքի 164-րդ հոդված: Ուստի նրանք պահանջում են քրեական պատասխանատվության ենթարկել Ռուբեն Հայրապետյանին: