«7or»-ը 6 օր է` չի բացվում

Հունվարի 29-ի երեկոյան արդեն 7or.am կայքը չէր բացվում:

Այսօր առավոտյան այն մի պահ երևաց մոնիտորների վրա եւ դարձյալ անհասանելի դարձավ այցելուների համար: Այդ կարճ ժամանակամիջոցում էլ հասցրեցինք կայքի գլխավոր լուրից տեղեկանալ, որ այն ենթարկվել է հարձակման, ընդ որում` ոչ թուրքերի կամ ադրբեջանցիների կողմից: Ներսից` Հայաստանից, ինչպես տեղեկացնում էր գլխավոր լուրը:

Այսօր հեռախոսով կապվեցինք կայքի գլխավոր խմբագիր Անդրանիկ Թևանյանի հետ: Նա հաստատեց իր իսկ ստորագրությամբ տեղադրված լուրի իսկությունը եւ ասաց, որ մինչ այս պահն էլ աշխատանքներ են տարվում կայքի բնականոն հասանելությունը ապահովելու համար:

«Սերվերի հետ կապված խնդիրները խմբագրությանը թույլ չեն տալիս ստանալու էլեկտրոնային փոստը»,- ավելացրեց Ա. Թևանյանը: Նա հեռախոսով եւս վստահություն հայտնեց, որ կայքը հարձակման է ենթարկվել ներսից: