WikiLeaks-ը ներկայացվել է Նոբելյան մրցանակի

Նորվեգիայի խորհրդարանի 26-ամյա անդամ, Սոցիալիստական կուսակցության ներկայացուցիչ Սնորե Վալենը իր բլոգում պատմել է, որ WikiLeaks կայքը ներկայացրել է խաղաղության գծով Նոբելյան մրցանակի. տեղեկացնում է «Նովոստի» գործակալությունը:

«Շատ երկրներ արտահայտվել են WikiLeaks-ի` հասարակական հետաքրքրություն ներկայացնող նյութեր հրապարակելու իրավունքի դեմ: Սակայն միայն ԶԼՄ-ների միջոցով են մարդիկ տեղեկանում կառավարությունների կողմից իշխանության չարաշահման մասին»,- գրել է Վալենը: Նրա կարծիքով, կայքի գործունեությունը «տեղեկատվական ահաբեկչություն» որակելով, դրա հակառակորդները հանդես են գալիս ժողովրդավարության եւ մարդու իրավունքների դեմ:

2011 թվականի Նոբելյան մրցանակի հավակնորդների առաջադրումն ավարտվել է փետրվարի 1-ին: Ավանդաբար Նոբելյան կոմիտեն այդ ցուցակը չի հրապարակում: