Նախարարը շնորհակալ է լրագրողներից` սվիններով չընդունելու համար

Չնայած պաշտոնավարման 100 օրը չէր լրացել, այդուհանդերձ այսօր ՀՀ նորանշանակ նախարար Հրայր Թովմասյանը հանդիպեց լրագրողների հետ` հույսով, որ Նապոլեոնն իրենից չի նեղանա:

Նա ներկայացրեց Արդարադատության նախարարության առաջիկա անելիքներն ու նպատակները:

«Արդարադատության նախարարությունը պատրաստ է բաց երկխոսության` մամուլի հետ»,- իր առաջին ասուլիսում հայտարարեց Հրայր Թովմասյանը եւ շնորհակալություն հայտնեց լրագրողներից` իրեն սվիններով չընդունելու համար:

Նախարարը նշեց, որ իր հասարակության սպասելիքներն իրենից շատ մեծ են: Մի մասը կարծում է, որ կարող է բարեփոխումներ իրականացնել համակարգում, մյուս` ավելի փոքր մասի համոզմամբ էլ նախարարը կձախողվի, քանզի այդ կերպարը քաղաքականության մեջ ասելիք չունի: «Ես հակված եմ իրականացնել առաջին խմբի սպասումները»,- հավաստիացրեց նախարարը: