Հայ, ռուս և ամերիկացի լրագրողներից կազմված խումբը մեկնել է Արցախ

«Գանձասարի վերածնունդ» ծրագրի շրջանակներում հայ, ռուս և ամերիկացի 56 լրագրողներից բաղկացած խումբ է այսօր մեկնել Լեռնային Ղարաբաղի Հանրապետություն` ծանոթանալու սփյուռքահայ բարերարների ներդրումներին եկեղեցաշինության բնագավառում: Խմբում է նաեւ «Երկիր»-ի լրագրողը:

Նախատեսվում է հանդիպում Հայ Առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանի հետ: Կկազմակերպվեն այցեր Գանձասար, Ստեփանակերտ, Շուշի, ինչպես նաև Ստեփանակերտի մատույցներում կառուցվող օդանավակայան:

Ի դեպ, ռուս և ամերիկացի լրագրողների անուններն իրենց խնդրանքով գաղտնի են պահվում` նկատի ունենալով ադրբեջանական տխրահռչակ «սև ցուցակում» հայտնվելու հեռանկարը:

Շրջայցը կազմակերպել է «Գանձասարի վերածնունդ» ծրագրի իրականացման գրասենյակը` Արցախի թեմի առաջնորդ Պարգև արքեպիսկոպոս Մարտիրոսյանի նախաձեռնությամբ: