Տաջիկստանը մրցում է Ադրբեջանի հետ

Տաջիկստանը որոշել է աշխարհի ամենաերկար դրոշակաձողը կանգնեցնել: Աշխատանքներն արդեն սկսվել են, նախագահ Էմոմալի Ռախմոնովն այսօր արդեն մայրաքաղաք Դուշաբեում կանգնեցրել է Տաջիկստանի ազգային դրոշի հիմնաքարը: Դրոշակաձողը 165 մետր է, որը 3 մետրով գերազանցում է այս տարվա մայիս ամսին Գինեսի ռեկորդների գրքում գրանցված և ռեկորդի ներկա կրող Ադրբեջանի կանգնեցրած դրոշակաձողից:

Տաջիկստանն այս կատեգորիայում 133 մետրանոց դրոշակաձողով նախկինում արդեն գրանցել է ռեկորդ և պահել այն մինչև 2008 թվականը:

Գինեսի ռեկորդների գրքի խոսնակն ասել է, որ այս «խելագարությունը» սկսվել է այն ժամանակ, երբ Միացյալ Արաբական Էմիրությունները 2001 թվականին 123 մետրանոց դրոշակաձող են կառուցել: