Իրանի հետ գործարքի մասին վերջնական որոշումը կընդունվի այսօր. Թրամփ

ԱՄՆ նախագահ Դոնալդ Թրամփը Truth Social սոցցանցում հրապարակել է Իրանի հետ գործարք կնքելու իր պայմանները։

«Իրանը պետք է հրաժարվի միջուկային զենք ստեղծելու ցանկացած հնարավորությունից, իսկ Հորմուզի նեղուցը պետք է անմիջապես բացվի ազատ նավարկության համար՝ առանց որևէ սահմանափակման կամ վճարների»,-գրել է Թրամփը՝ նշելով, որ նեղուցում տեղադրված ականների զգալի մասն արդեն վնասազերծել են ԱՄՆ ռազմածովային ուժերն, իսկ մնացածը պետք է ոչնչացվեն Իրանի մասնակցությամբ։

ԱՄՆ նախագահը տեղեկացրել է, որ գործարքի մասին վերջնական որոշումը կընդունվի այսօր Սպիտակ տանը։

Հիշեցնենք՝ ԱՄՆ-ը և Իսրայելը Իրանի դեմ պատերազմը սկսել են փետրվարի 28-ին։

Ապրիլի 7-ին ԱՄՆ նախագահը հայտարարեց Իսլամական Հանրապետության հետ երկշաբաթյա փոխադարձ հրադադարի մասին։ Իրանական կողմի տվյալներով՝ պատերազմի 40 օրվա ընթացքում ամերիկա-իսրայելական հարվածների հետևանքով զոհվել է 3,375 իրանցի։

Ապրիլի 11-ին Թեհրանի և Վաշինգտոնի պատվիրակությունները բանակցություններ վարեցին Իսլամաբադում, սակայն մի շարք հակասությունների պատճառով համաձայնության չեկան հակամարտության երկարաժամկետ կարգավորման հարցում։