Ռուսական բանակը վերահսկողության տակ է վերցրել Խարկովի մարզի 2 գյուղ. ՌԴ ՊՆ

Ռուսաստանի զինված ուժերը վերահսկողության տակ են վերցրել Խարկովի մարզի Բորովայա և Կուտկովկա գյուղերը։ Տեղեկությունը հայտնել է ՌԴ պաշտպանության նախարարությունը:

Ակտիվ մարտական գործողություններ են իրականացրել «Արևմուտք» զորախմբի ստորաբաժանումները։

Կուտկովկա գյուղը գտնվում է Խարկովի մարզի Դվուրեչանսկի շրջանում։ 2001 թվականի մարդահամարով այն ունի 678 բնակիչ։

Բորովայա գյուղը գտնվում է Խարկովի մարզի Իզյումի շրջանում։ Ըստ 2001 թվականի մարդահամարի տվյալների՝ գյուղն ուներ 6806 բնակիչ, իսկ 2013 թվականի հունվարի 1-ի դրությամբ՝ 5740 բնակիչ։

Այսօր առավոտյան ՌԴ ԶՈւ գլխավոր շտաբի պետ Վալերի Գերասիմովը տեսչական այց է կատարել «Արևմուտք» խմբավորում և հայտարարել, որ ակտիվ հարձակում է ընթանում զորախմբի պատասխանատվության ամբողջ գոտում՝ մոտ 350 կմ երկայնքով: Բացի այդ, հարձակումը զարգացնում են Կուպյանսկ քաղաքից արևմուտք տեղակայված 6-րդ բանակի ստորաբաժանումները։