Սադախլոյում՝ հայ-վրացական սահմանին, առգրավվել է 103 կգ մետամֆետամին․ ձերբակալվել է Վրաստանի և Թուրքիայի քաղաքացի հանդիսացող մեկ անձ 

Վրաստանի իրավապահ մարմինները Սադախլո մաքսային անցակետում առգրավել են 103 կգ մետամֆետամին, որի արժեքը սև շուկայում գնահատվում է մոտ 30 միլիոն լարի։ Խոսքը վերաբերում է թմրանյութերի ամենախոշոր խմբաքանակներից մեկին, որը Վրաստանի սահմանին կանգնեցվել է Եվրոպա տեղափոխվելու ճանապարհին։

Քննության տվյալներով՝ բեռնատարը շարժվում էր Հայաստան-Վրաստան-Բուլղարիա երթուղով։ Փաստաթղթերի համաձայն՝ բեռը պետք է պարունակեր կաուստիկ սոդա, սակայն ստուգման ընթացքում սոդայի պարկերում հայտնաբերվել է մետամֆետամին։

Ձերբակալվել է մեկ անձ՝ Վրաստանի և Թուրքիայի երկքաղաքացի, որը հանդիսանում է ընկերություններից մեկի տնօրենը։ Քննության վարկածով՝ հենց նա է վարորդին հանձնարարել կաուստիկ սոդայի փոխարեն Վրաստան ներմուծել մետամֆետամինով լի պարկեր։

Իրավապահները հայտարարում են, որ քննությունը շարունակվում է ինտենսիվ ռեժիմով, և իրականացվում են գործողություններ գործին առնչվող այլ անձանց բացահայտելու ուղղությամբ։ Քննության գնահատմամբ` թմրանյութերի «գնորդը» բեռին սպասում էր Բուլղարիայում։

Կենտրոնական քրեական ոստիկանության վարչության տվյալներով՝ 51-ամյա մեղադրյալը նախ իր բեռնատարն ուղարկել է Հայաստան, որտեղ կցորդը բեռնվել է մետամֆետամինով, ապա բեռը տեղափոխվել է Վրաստան։

Մեղադրյալին սպառնում է մինչև 20 տարվա կամ ցմահ ազատազրկում:

Աղբյուրը՝ Vector News։