Թրամփը Սիրիայի նախագահին հորդորել է կարգավորել Իսրայելի հետ հարաբերությունները

ԱՄՆ նախագահ Դոնալդ Թրամփը Սիրիայի անցումային շրջանի նախագահ Ահմեդ աշ-Շարաայի հետ Սաուդյան Արաբիայում կայացած հանդիպման ժամանակ նրան կոչ է արել լավացնել Իսրայելի հետ հարաբերությունները։ Այս մասին հաղորդում է BBC-ն։ 

Սպիտակ տան խոսնակի խոսքով՝ Թրամփն աշ-Շարաային կոչ է արել ստորագրել Աբրահամի համաձայնագրերը արաբաիսրայելական հարաբերությունների կարգավորման վերաբերյալ։

Ըստ Սպիտակ տան՝ ԱՄՆ նախագահը Սիրիայի ղեկավարին կոչ է արել բոլոր «օտարերկրյա ահաբեկիչներին» հեռացնել Սիրիայից, մասնավորապես նշելով, որ «պաղեստինցի ահաբեկիչները» պետք է արտաքսվեն։ Բացի այդ, Թրամփը Սիրիայի նոր ղեկավարությանը կոչ է արել օգնել թույլ չտալ «Իսլամական պետություն» խմբավորման վերածնունդը։

Սիրիայի կառավարությունն իր հերթին հայտարարություն է տարածել երկու ղեկավարների հանդիպումից հետո՝ նշելով, որ շեշտը դրվել է Սիրիայի նկատմամբ պատժամիջոցների չեղարկման, ահաբեկչության դեմ պայքարում սիրիա-ամերիկյան համագործակցության ուղիների որոնման և «Իսլամական պետության» և այլ դերակատարների ազդեցությունը չեզոքացնելու վրա։

Հանդիպումը տեղի է ունեցել այն բանից հետո, երբ Թրամփը հայտարարել է Սիրիայի նկատմամբ սահմանված պատժամիջոցները չեղարկելու մասին՝ երկրին առաջընթացի և բարգավաճման հասնելու հնարավորություն տալու նպատակով։