Պատրաստ ենք կարգավորել Սաուդյան Արաբիայի հետ հարաբերությունները. Իրանի ԱԳ նախարար

Իրանի ԱԳ նախարար Մոհամմադ Ջավադ Զարիֆը հարցազրույց է տվել Լոնդոնում տպագրվող Al-Araby Al-Jadeed արաբական օրաթերթին:

Ի թիվս այլ հարցերի` Իրանի արտաքին քաղաքական գերատեսչության ղեկավարն անդրադարձել է նաև Սաուդյան Արաբիայի հետ Իրանի լարված հարաբերություններին՝ նշելով, որ պաշտոնական Թեհրանը պատրաստ է կարգավորել Սաուդյան Արաբիայի հետ իր հարաբերությունները. տեղեկացնում է Alikonline-ը:

«Սաուդյան Արաբիայի հետ հարաբերությունների կարգավորման համար չունենք որևէ խնդիր: Խնդիրը վերաբերում է Սաուդյան Արաբիային. Ռիադին անհրաժեշտ է վերանայել իր քաղաքականությունը, որը կնպաստի տարածաշրջանում լարվածության որոշակի թոթափմանը»,- ասել է Զարիֆը:

Նա նշել է, որ Թեհրանում տեղյակ են եղել Սաուդյան Արաբիայի թագաժառանգ, արքայազն Մուհամեդ բին Սալմանի՝ Իրանի բարձրաստիճան պաշտոնյաներին սպանելու ծրագրի մասին: «Սա նորություն չէ: Սաուդյան Արաբիան տարիներ է, ինչ աջակցում եւ հովանավորում է Իրանում աշխատող ահաբեկչական խմբավորումներին: Նրանք հայտարարել էին, որ մտադիր են հակամարտությունն Իրանի սահմաններից ներս տեղափոխել: Դրանից հետո մենք ահաբեկչական խմբավորումների գործունեության ակտիվացման ականտեսը եղանք: Վերջին շրջանի իրադարձություններն ու բացահայտումները գալիս են հերքելու Սաուդյան Արաբիայի դեմ՝ Իրանի ենթադրյալ սադրանքների մասին հայտարարությունները: Ընդհակառակը` դրանք ապացուցում են, որ Իրանին հարվածելու նպատակով Սաուդյան Արաբիան է լարվածություն սադրում»,- ասել է Զարիֆը: