Իսրայելն ու Մարոկկոն կարգավորել են հարաբերությունները. միջնորդել է Թրամփը

Մարոկկոյի, ԱՄՆ-ի և Իսրայելի իշխանությունները երեքշաբթի Ռաբաթում ստորագրել են համատեղ հռչակագիր: Ըստ Maghreb Arabe Press (MAP) լրատվական գործակալության՝ փաստաթուղթը ստորագրել են Մարոկկոյի վարչապետ Սաադ ալ Դին ալ Օսմանին, ԱՄՆ նախագահի ավագ խորհրդական ու փեսա Ջարեդ Քուշները և Իսրայելի ազգային անվտանգության խորհրդի ղեկավար Մեյր Բեն Շաբաթը: Արարողությունն անցկացվել է Մարոկկոյի թագավոր Մուհամեդ VI-ի ներկայությամբ:

Փաստաթղթում նշվում է, որ «ԱՄՆ-ը ճանաչում է Մարոկկոյի ինքնիշխանությունը Արևմտյան Սահարայի ամբողջ տարածքում և վերահաստատում իր աջակցությունը ինքնավարություն տրամադրելու՝ Մարոկկոյի լուրջ, վստահելի և իրատեսական առաջարկին՝ որպես Արևմտյան Սահարայի վեճի արդար և տևական կարգավորման միակ հիմքը»:

«Այս նպատակի առաջընթացը հեշտացնելու համար Միացյալ Նահանգները Մարոկկոյի հետ կնպաստի տնտեսական և սոցիալական զարգացմանը, այդ թվում՝ Արևմտյան Սահարայում, և այդ նպատակով հյուպատոսություն կբացի Արևմտյան Սահարայում՝ Դախլայում, տարածաշրջանի տնտեսական և առևտրային հնարավորություններն առաջ տանելու համար»,- ընդգծվում է համատեղ հռչակագրում: