Ավելի են լկտիանալու՝ գնալով նոր թանկացումների․ քաղաքական փոփոխություններով է հնարավոր հասնել խնդիրների լուծմանը․ Թևանյան

«Փաշինյանը, Ավինյանն ու մյուսներն օրինագիծ են քննարկելու ԱԺ-ում․ բոյկոտի դեմ բերել են 15 հազար դրամի տուգանք, այսինքն՝ ովքեր չեն վճարում տրանսպորտի ուղեվարձը, տուգանվելու են ու երկրորդ, ուղևորափոխադրման վարձը սահմանել են որպես տեղական վճար»,- այսօր լրագրողների հետ ճեպազրույցի ժամանակ ասաց «Մայր Հայաստան» դաշինքի առաջնորդ Անդրանիկ Թևանյանը։
 

«Այսօր ԱԺ-ում հանձնաժողովի նիստ է տեղի ունենալու, որտեղ քննարկվելու է վերոնշյալ հարցը: Սա նշանակում է, որ Նիկոլ Փաշինյանն օրինական բոլոր ճանապարհները փակում է սոցիալական այս կարևոր խնդիրը լուծելու համար»: Նրա խոսքով՝ «հունվարից քաղաքային իշխանությունն ավելի է լկտիանալու՝ գնալով նոր թանկացումների»:
 

Հիշեցնենք, որ  Անդրանիկ Թևանյանը ՖԲ գրառում էր արել՝ նշելով․ «Նիկոլ Փաշինյանը քաղաքացուն տուգանքի մատերիալ դարձնելու օրինագիծ է բերել՝ վախենալով քաղաքային տրանսպորտի թանկացման դեմ բոյկոտից և փորձելով «օրենքով» արգելափակել այս թեմայով հանրաքվե անցկացնելու «Մայր Հայաստանի» նախագիծը»։