Գառնիկ Դանիելյանի միջամտությամբ քննարկվում է քաղաքացուն խանգարող ենթակայանը տեղափոխելու հարցը

«Հայաստան» խմբակցության պատգամավոր Գառնիկ Դանիելյանը գրում է․
 

«Շաբաթներ առաջ ինձ էր դիմել քաղաքացին՝ ահազանգելով, որ իր հողամասի մերձակայքում կա ապօրինի ենթակայան, ինչը հաճախակի վթարներ, պայթյուններ է առաջացնում։  Քաղաքացին տարիներ շարունակ դիմել էր պատկան մարմիններին, ՀՀ ՄԻՊ-ին, դատական հայց ներկայացրել, սակայն, խնդիրը չէր լուծվել։

Օրերս գրություն ուղարկեցի ՀԷՑ-ին՝ հարցը ուսումնասիրելու, ենթակայանը ապամոնտաժելու առաջարկով։  Սկզբում ՀԷՑ-ից հայտնեցին, որ իրենք չեն կարող անջատել ենթակայանը, քանի որ էլեկտրակայանից օգտվում է շուրջ 163 սպառող։ Տեղեկացրին նաև, որ իրենք դիմել են Երևանի քաղաքապետարան՝ ենթակայանը տեղափոխելու համար 20 քմ հողամաս հատկացնելու առաջարկով, ինչին ի պատասխան, քաղաքապետարանը բացասական է արձագանքել։

 Եվս մեկ գրությունից հետո ՀԷՑ-ից տեղեկացնում են, որ արդեն իսկ քննարկումներ են ընթանում ենթակայանի տեղափոխման շուրջ։

Ինձ համար մեծ ուրախություն է, երբ հետևողական քայլերից հետո այս կամ այն չափով լուծվում են մեր քաղաքացիներին հուզող հարցերը»։