ԵԱՏՄ-ն գործընկերների հետ ազատ առևտրի մասին ևս 2 համաձայնագիր կստորագրի. Օվերչուկ

Եվրասիական տնտեսական միությունը (ԵԱՏՄ) ազատ առևտրի վերաբերյալ ևս երկու համաձայնագիր կստորագրի։ Այս մասին հայտարարել է ՌԴ փոխվարչապետ Ալեքսեյ Օվերչուկը։

Եվրասիական տնտեսական հանձնաժողովը երեկ հայտարարել էր, որ Իրանի և ԵԱՏՄ երկրների միջև ազատ առևտրի գոտու մասին լիարժեք համաձայնագիրը ուժի մեջ կմտնի 2025 թվականի մայիսի 15-ին։ Ավելի վաղ ՌԴ առաջին փոխվարչապետ Դենիս Մանտուրովը հայտարարել էր, որ ԵԱՏՄ-ի և ԱՄԷ-ի միջև համաձայնագիրը կարող է ստորագրվել 2025 թվականի կեսերին։

«Մինչև տարեվերջ կարող ենք ակնկալել, որ ԵԱՏՄ-ում ազատ առևտրի վերաբերյալ ևս երկու համաձայնագիր կստորագրվի», – ասել է Օվերչուկը Ռուսաստանի արդյունաբերողների և ձեռնարկատերերի միության ժողովի ժամանակ։

Նա ռուսաստանյան գործարար համայնքին հորդորել է ավելի ակտիվ հետևել ԵԱՏՄ անդամ երկրների տարածքում նորմատիվ–իրավական փոփոխություններին, որոնք խոչընդոտում են ռուսական բիզնեսի մուտքը համապատասխան շուկաներ։

«Որպես ԵԱՏՄ ամենամեծ տնտեսություն՝ Ռուսաստանը գրավիչ շուկա է, և ԵԱՏՄ գործընկեր երկրների գործարար հանրության ներկայացուցիչները ուշադիր հետևում են Ռուսաստանի նորմատիվ–իրավական բազայի փոփոխություններին և արագ հայտնաբերում լուծումներ, որոնք խոչընդոտում են նրանց մուտքը մեր շուկա, եթե այդպիսիք, իհարկե, հայտնվում են։ Մենք, իհարկե, կցանկանայինք, որ մեր գործարար համայնքը ևս ակտիվ դուրս գա ԵԱՏՄ անդամ այլ երկրների շուկաներ և մեզ օպերատիվ տեղեկություններ տրամադրի ԵԱՏՄ իրավունքների խախտման մասին, եթե նման բան լինում է», – ասել է նա։

ՌԴ փոխվարչապետը հավելել է, որ աշխատանքներ են տարվում ռուսական շուկայի և գլոբալ հարավի շուկաների միջև տրանսպորտային և լոգիստիկ կապի ապահովման ուղղությամբ։